Exo 17 | BJR | STEP | Yáaweena ufa mau fíqa Isaraee máqannaasa Sinnaa aadána máqa máaqakiqari quqásee fiqau. Fídaqa misa maqúsa maqusa faiqaqá fímariqau. Misa Reefidimma máqa máaqaki nammári sía máruqoo óonu máriqau.

Exodus 17

Óonikiqari nammári qúminau.

(Namba 20:1-13)

1 Yáaweena ufa mau fíqa Isaraee máqannaasa Sinnaa aadána máqa máaqakiqari quqásee fiqau. Fídaqa misa maqúsa maqusa faiqaqá fímariqau. Misa Reefidimma máqa máaqaki nammári sía máruqoo óonu máriqau. 2 Sía márufaqa misa Mooseenara kaukaata qídaqa qiqau. Anée nammári nímina naanée qufanóo Mooseefa qímanniminoo qinau. Ínnee nánaree qiní áanoo qíma qímaqáidee. Nánaree ínnee Yáaweena amanammásee qáfaídee.

3 Isaraee máqannaasa nammáriara káaqa nídufaqa Mooseena káqi kai áanoo qímamaqee máriqau. Misa maaqí qiqau. Nánaree anee maasa Isipa máqa máaqaindaraana qífiqee míni sáananoo fee nammáriara dídírafa maasá faqa maasá faiqi námu faqa maasá aandáuqa námufaqa kuqá dáruannoo fee.

4 Miqí qufanóo Mooseefa afeekai kámmaseenoo Yáaweenara innaaru qídanoo qinau. Óo Yáawee qinée maa fasiqa anaaseesá náqifeemma nímaqáanauree. Misá qúsasaa óonisamu qiní dárifaranoo. 5 Yáaweefa Mooseena qímaminoo qinau. Moosee anée Isaraee máqannaasa úriqararausa nífiqee indaarú fua. Óoqai anee Niru nammári árunna saununa faqa máree fua. 6 Qinée Sinai áaqanasaa ínni nóorinni óonisaa kikíqìqa márianaura. Aneenná sáunù samu óoni arusáinanoo nammári minakíqari qúminaqa faiqí ánaasee naaqa. Miqí qufanoo Mooseefa Isaraee máqanna úriqararausa nífusaa miqímandoofanoo nammári qúminau. 7 Misá mi maqa maaqána áuqu qaara auqú raqau. Masaa fáqa Meeribaa fáqée qiqau. Mi auqu qandá óosana amana másee qáfarafa faqa áanoo qírafa fáqee qiqau. Áanoo qídaqa qiqau. Yáaweefa maasá faqa máridanoo fee sía fee máridanoo fee. Misa mi ufánannai Yáaweena amana másee qáfaqau.

Isaraee máqannaasa Amareeka máqannaasa faqa rákiqau.

8 Isaraee máqannaa Reefidimma máqa máaqai márufaqa Amareekana áiku ásauku aniréeqa misá náriqau. 9 Mooseefa misá nídafamásee Yoosuaana qímaminoo qinau. Anée akaqá fásiqauqa mara quqásainaqa dúna kananaana Amareekana áiku ásauku faqa óonu rákúaqa. Qinee áaqanasaa Ánutufa márana núannèe qímasee qímaqimu saunúna uqusée kikíqìqá márianaura. 10 Yoosuaafa eedóo qímasee kanánaana iqáqoofanoo dóo Amareekana áiku ásauku faqa rákirara nífiqee finau. Fufaqa Mooseefa fáqa Áaroonafa fáqa Hurafa faqa áaqanai óoru fiqau. 11 Mooseefa áaqanasaa kikíqamámbufanoo ásaukuqara uqéerasoofaqa Isaraee máqannaasa rákiranaki afeekaíkiqau. Kafáa narí ásauku múqufisoofaqá Amareekana áiku ásauku rákiranaki afeekaíkiqau. 12 Mooseena ásauku anudá qoofaqa Áaroonasa Hurasa óoni ufiqísoofanoo Mooseefa minásaa óoqu marifufanóo Áaroonasa Hurasa Mooseena ásaukuqara uaqéeufanoo kísaaqasaa márufanoo súani kéeqanau. 13 Miqímmasee uaqéeunara Yoosuaafa fáqa narí rákira fásiqauqa fáqa Amareekana áiku ásauku ámiqimmásee naruqaraasiqau.

14 Miqímmásoofanoo Yáaweefa Mooseena qímaminau. Anée papiqakí maa rakiránara ákararumma quqáa. Miqínoo márinaqa káqi íriqa nuaqa. Yoosuaana qímamia. Qinée Yáaweesa Amareekana áiku ásauku kurídi taikásaanaura. 15 Rákirafa taikáfufanoo Mooseefa óoniuqa qumáreenoo mi maqa maaqánaki qaindá áuquseenoo mi qaindána áuqureenoo Yáaweefa qiní rákira sáqari fée qímasee mi qaindána áuqu ranau. 16 Mooseefa kafáa qinau. Ínnee Yáaweena rákira saqari uqéeraaqa. Yáaweefa káqi kai Amareekana áiku ásauku faqa naaruara rákida máriannoo.